د ارشاد، حج او اوقافو وزیر د اندونیزیا هېواد د محمدیه سازمان علماوو له رییس سره وکتل
چهار شنبه ٣مرغومي ١٣٩٩
نن د ارشاد، حج او اوقافو وزیر محمد قاسم حلیمي د اندونیزیا هېواد د محمدیه سازمان علماوو رییس ښاغلي دوکتور یوسف کلا او ورسره مېلمه پلاوي ته په ولسمشرۍ ماڼۍ کې ښه راغلاست وویل او د غونډې د اجنډا په اړه یې تفصیلي خبرې وکړې.
ورپسې د محمدیه سازمان د علماوو رییس او د اندونیزیا د پخواني ولسمشر مرستیال دوکتور یوسف کلا د چارواکو د تود هرکلي او مېلمه پالنې ستاینه وکړه او ویې ویل، چې د اندونیزیا دولت چمتو دی، چې د افغانانو په مشرۍ د سولې پروسې ملاتړ ته دوام ورکوي، ترڅو د افغان حکومت او طالبانو ډلې ترمینځ د دیني او مذهبي خبرو د پیل منځګړیتوب وکړي.
نوموړي وویل: اندونیزیا د افغانستان د امنیت، سوکالۍ، پرمختګ، بیارغونې، پراختیا او د سولې پروسې ملاتړ په برخه کې خپلو هڅو ته دوام ورکوي هغه زیاته کړه: وروسته له دې چې څه موده وړاندې په اندونیزیا کې د افغانستان د سولې په اړه د عالمانو درې اړخیز کنفرانس ترسره شو، دې هېواد پریکړه وکړه، چې یو سیمه اییز کنفرانس هم په جاکارتا ښار کې په لاره واچوي، چې په دې کنفرانس کې به د افغانستان ګاونډي هېوادونه هم شامل وي.
هغه د نورو موضوعاتو ترڅنګ اندونیزیا ته د ښځینه عالمانو په ګډون د افغان عالمانو د لېږلو او په انډونیزیا کې د دوی د روزنې او تجربو د تبادلې، افغانستان ته د اندونیزیا د حج پروسې څخه د تجربو د لېږد، د هغه هیواد په پوهنتونونو او مدرسو کې د عالمانو لپاره د بورسونو د چمتو کولو او نورو مسلو په اړه هم بحث وکړ.
