هېواد ته د حاجیانو راستنیدو د هرکلي په تړاو مقدماتي غونډه ترسره شوه
۱۴ ذوالحجة ۱۴۴۴هـ ق (۱۱ د سرطان ۱۴۰۲ هـ ش)
له سعودي عربستان څخه د افغان حاجیانو د راستنیدو او په کابل نړیوال هوايي ډګر او د حاجیانو په مجتمع کې د هغوی د هرکلي لپاره د لازمو تیاریو او ترتیباتو په موخه د حج رئیس قاضي فیض محمد مختار تر مشرۍ لاندې د حج کاري کمېټو د مسؤولینو په حضور کې د مرکز زون د حاجیانو په مجتمع کې غونډه جوړه شوه.
غونډه د قرآن کریم څو مبارکو آیتونو په تلاوت سره پیل شوه، ورپسې د غونډې غړو خپل نظریات او وړاندیزونه غونډې ته وړاندې کړل.
وروسته بیا د حج رئیس محترم قاضي فیض محمد "مختار" خبرې وکړې او حرمینو شریفینو ته د حاجیانو لېږد په برخه کې د حج کاري کمېټو د پرسونل هڅې وستایلې.
نوموړي زیاته کړه: الحمدلله د افغان حاجیانو د لیږد بهیر د ارشاد، حج او اوقافو وزیر محترم شیخ الحدیث دکتور مولوي نورمحمد "ثاقب" په لارښونو او هڅو او د رهبرۍ غړو او د حج کاري کمېټو مسؤولینو د نه ستړي کیدونکو هلو ځلو په پایله کې په بریالیتوب سره پای ته ورسېدی.
ښاغلي مختار وویل: اوس چې هېواد ته د حاجيانو د راستنېدو په درشل کې يوو، د ټولو کمېټو مسؤولينو په هلو ځلو او همکاريو د حاجيانو خدمت ته اړتيا ده لکه څنګه چې موږ د حاجیانو د لیږد پروسه په بریالیتوب سره پای ته ورسوله، نو هیله لرو چې د افغان حاجیانو د راستنیدو پروسه هم زموږ د قدرمنو همکارانو په هڅو په بریالیتوب سره پای ته ورسېږي.
د غونډې په پای کې د کمېټو مسؤولينو ته د دوى د کاري استقامت په اساس لازم تصميمونه او لارښوونې ورکړل شوې.
