د ارشاد، حج او اوقافو وزیر د اریانا افغان هوايي شرکت له مسؤلینو سره وکتل
۲۹ جمادی الثانیة ۱۴۴۴ هـ ق (۲، دلو ۱۴۰۱ هـ ش)
نن د غرمې وروسته د ارشاد، حج او اوقافو وزیر شیخ الحدیث دکتور مولوي نور محمد ثاقب ددې وزارت د مسؤلینو په ګډون د اریانا افغان هوايي شرکت له رئیس حاجي مولوي رحمت الله آغا سره په خپل کاري دفتر کې وکتل.
په لومړي سر کې د ارشاد، حج او اوقافو وزیر د خپلو خبرو په ترځ کې په ۱۴۴۴ هجري قمري کال کې افغان حاجیانو ته د غوره او لازیاتو خدمتونو د وړاندې کولو په اړه په بېلابېلو موضوعاتو خبرې وکړې.
همدا راز د ياد شرکت د خدمتونو وړاندې کولو په برخه کې يي د تېر کال د تجربو څخه د ګټې اخیستني په اړه هم خبرې وشوې.
د اریانا افغان هوایي شرکت رئیس لخوا د شته ظرفیتونو او اسانتیاوو او په راتلونکي حج کې د حاجیانو د لېږد د پلان په اړه هر اړخیز معلومات وړاندې شول او زیاته یې کړه، چې د حاجيانو لېږد سوداګري نه، بلکې خپل ديني مکلفيت ګڼو او ژمنه يې وکړه، چې حاجيانو ته د لا زياتو اسانتياوو په برابرولو کې هر راز همکاریو ته چمتو يو.
