د ارشاد، د حج او اوقافو وزارت مرستیال د ترکیې هېواد د دیني علومو له اکاډمۍ څخه لېدنه وکړه
سه شنبه ۶ رجب ۱۴۴۶ هـ ق (۱۸ جدې ۱۴۰۳ هـ ش)
د ارشاد، حج او اوقافو وزارت د عرفان او دیني ځایونو د چارو تنظیم مرستیال شیخ مولوي عزیز الرحمن منصور او ورسره پلاوي د ترکیې هېواد د دیني اکاډمۍ له رئیس پوهاند ډاکټر انور عثمان سره په داسې حال کې ولیدل چې د افغان پلاوي د غړو ترڅنګ د ترکیې د دیني علومو اکاډمۍ غړو هم ګډون درلود.
په پیل کې د ترکیې د دیني علومو اکاډمۍ رئیس پوهاند ډاکټر انور عثمان له افغانستان څخه ورغلي هیئت ته ښه راغلاست وویلي او د دیني علومو د اکاډمۍ د کارونو او لیدلوري په اړه یې افغان پلاوي ته مفصل معلومات وړاندې کړل.
د ښاغلي عثمان په وینا د ترکیې هېواد د دیني علومو اکاډمۍ د تېرو (۴۹) کلنو راهیسې د دیني علومو په زده کړو کې پراخې تجربې لري چې دغه تجربې له نورو ډیرو اسلامي هېوادونو سره د زده کړو په برخه کې شریکې کړي.
ورپسې شیخ مولوي عزیز الرحمن منصور د دیني علومو د اکاډمۍ د رئیس پوهاند ډاکټر انور عثمان د مفصلو معلوماتو له وړاندې کولو څخه مننه وکړه او وې ویل چې د افغانستان اسلامي امارت به د ترکیې هېواد د دینې علومو د اکاډمۍ له پراخو او ارزښتمنو تجربو څخه موثره ګټه پورته کړي ترڅو په افغانستان کې دینې او مذهبي بنسټونه لا پیاوړي او پراخه شي.
ښاغلي منصور په خپلو خبرو کې زیاته کړه، چې د دواړو اسلامي هېوادونو ترمنځ دغه ډول مثبتې ناستې د دیني، مذهبي، کلتوري او علمي همکاریو د پراختیا لپاره مهمې او ګټورې ثابتېدای شي.
