د شریعت او قانون له نظره د ښځو د حقونو څلور ورځنی روزنیز ورکشاپ
د ارشاد حج او اوقافو وزارت د اطلاعاتو او عامه اړیکو ریاست په کتابتون کې د قانون او شریعت په برخه کې د متخصصو مېرمنو له لوري د دغه وزارت د جندر امرې په همکارۍ د ۱۳۹۹لمریز کال د لېندۍ په ۱۶نېټه ''د شریعت او قانون له نظره د ښځو حقونه'' تر عنوان لاندې څلور ورځنی روزنیز ورکشاپ دایر شو.
ددغه ورکشاپ په پرانیست غونډه کې د ارشاد، حج او اوقافو وزارت مسلکي مرستیال دوکتور امین الدین مظفري په ټولنه کې دښځو د حقوقو په اړه هر اړخېزه وینا وکړه، نوموړي وویل: له بده مرغه چې زموږ په ټولنه کې د ښځو حقونه د افراط او تفریط قرباني شوي دي، نوموړي وویل، چې د قانون او شریعت له نظره د ښځو د حقونو په اړه ناخبري په ټولنه کې د تاوتریخوالي ستر لامل دی.
ښاغلي مظفري د قانون او شریعت له مخې د ښځو د حقونو په اړه د داډول ورکشاپونو او روزنیزو پروګرامونو جوړل ارزښتمند یاد کړل او هېله یې څرګنده کړه، چې دا ډول پروګرامونه به وکولی شي، چې د ګډونوالو د اسلامي معلوماتو زېرمه بډایه او د ښځو د حقونو په اړه په عامه پوهاوي کې مرسته وکړي.
د دغه پروګرام په لړ کې د هېواد لومړۍ مېرمنې بي بي ګل غني ویډیویي پیغام هم خپور شو چې په یوه برخه کې داسې راغلي وو:
د اسلام مقدس دین ښځې د جاهلیت زمانې له ظلم څخه وژغورلې او هغوی یې د خپلو اساسي حقونو څخه برخمنې کړې، لومړۍ میرمنې د بېلګې په توګه د واده حق ته اشاره وکړه، چې واده باید د دواړو خواوو په خوښه ترسره شي نه په جبر، زور او بدل. یا هم کله چې له یو بل څخه بېلېږي د انساء مبارک سورة ۱۹ایت مطابق باید له هغې سره سم چلند وشي.
په دغه پروګرام کې ستاره محبت له اسلام څخه د مخه او د اسلام په راتګ سره د ښځو د حقونو په اړه او ددې وزارت د جندر آمرې شکریه سلیمانخیل د ښځو پر وړاندې د تاوتریخوالي قانون په اړه ګډونوالو ته معلومات وړاندې کړل او زیاته یې کړه، چې د ښځو پر وړاندې د تاوتریخوالي د مخنیوي د ۱۶ورځني کمپاین سره سم د دغه پروګرام جوړول ډېر مهم و.
یاد پروګرام د قانون او شریعت متخصصو مېرمنو له لوري د اطلاعاتو او کلتور وزارت د پالیسۍ ریاست په نوښت په لار اچول شوی و، چې څلور ورځې یې دوام وکړ او ګډونوالو ته د یاد ګروپ د غړو له لوري د تصدیق پاڼو په ورکولو پای ته ورسېده.
