د روان کال د حاجیانو د معلمینو روزنیز سیمینار دویم پړاو په بریالتوب سره پای ته ورسیده.
پنجشنبه ۲۵ رمضان المبارک ۱۴۴۵ هـ ق (۱۶ حمل ۱۴۰۳ هـ ش)
د حاجیانو د معلمینو روزنیز سیمینار چې د یوې اونۍ لپاره د ارشاد، حج او اوقافو وزارت له لوري د مرکزي زون د حاجیانو په مجتمع کې پیل شوې وو نن د ارشاد، حج او اوقافو وزارت د مسلکي مرستیال شیخ الحدیث مولوي زر محمد حقاني او د مرکزي ریاستونو یو شمېر رئیسانو په حضور کې پای ته ورسېده.
د سیمینار د پای په غونډه کې د ارشاد، حج او اوقافو وزارت محترم مرستیال د حج په پروسه کې نیکو اخلاقو توصیې او بد گفتاریو څخه د ځان ساتنې موضوعاتو په تړاو معلمینو ته هر اخیز معلومات وړاندې کړل او زیاته یې کړه، چې حاجیانو ته هم د حج په پروسه کې د نیکو اخلاقو، صبر او تعمل په اړه توصیې وکړئ.
ښاغلي حقاني وویل: د نیکو اخلاقو نمونه زموږه او ستاسو خوږ نبي حضرت محمد ﷺ دی، باید ښه اخلاق، صبر او تعمل له هغوی څخه زده کړو.
همدا رنگه د معلمینو په استازيتوب مولوي آدم جان نعماني خبرې وکړې او زیاته یې کړه چې د افغانستان اسلامي امارت رهبرۍ او د ارشاد، حج او اوقافو وزارت مقام د پیرزوینې څخه مننه کوو، چې په علماء کرامو باندې یې باور وکړ او دغه لوی مسؤلیت یې مونږ او تاسو ته را وسپاره.
نوموړي د ارشاد، حج او اوقافو وزارت له لوري جوړ شوی نصاب، د دندو لایحې او نور مهم موضوعات گټور وبلل او د خپلو مسؤلیتونو د ښه تر سره کولو په تړاو یې ډاډ څرگند کړل.
د یادونې وړ ده چې په دې سیمینار کې د یوویشت ولایتونو د حجاج کرامو معلمینو ته د هېواد په کچه د لویو شیوخو، جیدو علماء کرامو او مسلکي استاذانو لخوا د یوې اونۍ په ترڅ کې دغه روزنیز سیمینار ترسره شو، چې د نورو ولایتونو معلمینو ته به په دریم پړاو کې دغه روزنیز سیمینار ترسره شي.
غونډه د وزارت د دعوت او ارشاد رئیس شیخ سید رحمن بغلاني د دعائیه په لوستلو سره پای ته ورسېده
