د جوماتونو د ارشاد او انسجام ریاست د ښوونیز ورکشاپ پای
شنبه د ۱۴۴۴.ه.ق. د محرم الحرام میاشتې ۲۲ مه (د زمري ۲۹)
نن د جوماتونو د ارشاد او انسجام ریاست له لوري ددغه ریاست د کارکوونکو د ظرفیت لوړونې په موخه جوړ شوی ورکشاپ د لازمو مهارتونو د تدریس څخه وروسته پای ته ورسېده.
د پروګرام په پای کې د جوماتونو د چارو د انسجام رئیس مفتي عبدالحمید شهید د خپلې علمي وینا په ترڅ کې په دغه ورکشاپ کې د کارکوونکو له فعال ګډون څخه مننه وکړه، دغه پروګرام یې ګټور وباله او د ښوونیزو پروګرامونو پر دوام یې ټینګار وکړ.
نوموړي د خپلو خبرو په دوام کې پر اورېدونکو غږ وکړ چې په خپلو کړنو کې اخلاص، د لوړ پوړو چارواکو اطاعت وکړي، وخت او د وخت مدیریت په پام کې ونیسي، نورو ته زیان ونه رسوي، او ښه چلند وکړي او یاد پروګرام خلکو ته د هوساینې په دعا کولو سره پای ته ورسېده.
د یادولو وړ ده چې دغه ورکشاپ د اوسني اړتیا سره سم د ظرفیتونو د لوړولو او د نظر د مدیریت د نویو میتودونو د تدریس، د څانګو ترمنځ د همکارۍ او همغږۍ په پار د یوې اونۍ لپاره جوړ شوی و ترڅو ددغه ریاست کارکوونکي د جوماتونو د انسجام په برخه کې خلکو او علماوو ته لا ځواب ویونکي ووسي.
