د ارشاد، حج او اوقافو وزارت نوی مسلکي مرسیتال معرفي شو
۸ صفر المظفر ۱۴۴۷ هـ ق، مطابق: ۱۲ اسد ۱۴۰۴ هـ ش
د عاليقدر امیرالمؤمنین حفظه الله د حکم پر اساس د ارشاد، حج او اوقافو وزارت لپاره نوی ټاکل شوی مسلکي مرستیال، شیخ ضیاءالرحمن مدني نن د یوې ځانګړې غونډې په ترڅ کې، چې د افغانستان اسلامي امارت د بېلابېلو ادارو یو شمېر مسؤولینو او د وزارت مرستیالانو، د مرکزي ریاستونو رئیسانو او کارکوونکو پکې ګډون کړی وو، معرفي شو.
غونډه د قرآن کریم د څو مبارکو آیتونو په تلاوت سره پیل شوه، ورپسې د چارو ادارې لوی ریاست د مرستیال، محترم مولوي سیفالدین تائب لخوا د وزارت د مسلکي مرستیال په توګه د ښاغلي شیخ ضیاء الرحمن مدني د تقرر په تړاو د عالیقدر امیر المؤمنین حفظه الله تعالی حکم ولوستل شو او ورته یې په سپارل شوي مسؤولیت کې د بریالیتوب هیله وښوده.
وروسته د ارشاد، حج او اوقافو وزارت اداري او مالي مرستیال ښاغلي مولوي عارفالله عارف خبرې وکړې، نوموړي، شیخ ضیاءالرحمن مدني ته د مبارکۍ ترڅنګ ښه راغلاست وویلو او له لوی خدای جلّ جلاله څخه یې ورته په نوې دنده کې د ښه خدمت د توفیق غوښتنه وکړه.
ښاغلي عارف زیاته کړه؛ د ارشاد، حج او اوقافو وزارت مسلکي معینیت د ارشادي او د دیني چارو د انسجام، حج او اوقافو د تنظیم په برخه کې د وزارت په چوکاټ کې یو مهم معینیت دی، چې باید د ټول هېواد په کچه د یادو چارو د لا ښه تنظیم او مدیریت په برخه کې اغېزناک ګامونه واخلي.
وروسته د ارشاد، حج او اوقافو وزارت نوی مسلکي مرستیال شیخ ضیاءالرحمن مدني خبرې وکړې؛ نوموړي د عاليقدر امیرالمؤمنین حفظه الله تعالی له باور څخه مننه وکړه او ژمنه یې وکړه چې په پوره اخلاص، صداقت او توان سره به ورسپارل شوې دنده او د اسلام مبارک دین او هېوادوالو خدمت ترسره کوي.
د غونډې په لړ کې د اسلامي امارت یو شمېر مسؤولینو خبرې وکړې او زیاته یې کړه چې د ارشاد، حج او اوقافو وزارت د افغانستان اسلامي امارت په چوکاټ کې یو مهم دیني ارګان دی، چې منابر او مساجد یې تر مدیریت لاندې دي او د اسلامي ارزښتونو د خپرولو، دیني شعائرو د پیاوړتیا او د ټولنې په هر اړخیزه اصلاح کې مهم رول لوبوي.
غونډه د دعائیې په ویلو سره پای ته ورسېده.
