د ارشاد، حج او اوقافو وزارت رهبري، ښځینه ديني عالمانو د اندونیزیا د محمدیه سازمان د علماوو له رئيس او مل پلاوي سره یې ګډه ناسته ترسره شوه
جمعه ٥مرغومي ١٣٩٩
په دې ناسته کې چې د ارشاد، حج او اوقافو وزیر محمد قاسم حلیمي او د وزارت د پالیسۍ او پلان معین محمد عثمان طارق هم برخه درلوده. لومړی محمد عثمان طارق د ناستې ګډونوال معرفي کړل. ورپسې آغلې نور حیاء د قرآن کریم د څومبارکو آیتونو په تلاوت سره غونډه پیل کړه.
ور پسې ددې وزارت د ښځو ارشادي رئیسې آغلې ملکه محب د اړونده څانګې د رامینځته کولو او اهدافو په اړه خبرې وکړې او د اندونیزیایی پلاوي څخه یې د افغان ښځینه عالمانو د ظرفیت په لوړولو کې د مرستې او همکارۍ د غوښتنې تر څنګ دوی ته یې د زده کړې د دوام فرصت برابرولو غوښتنه هم وکړه
ورپسې د مصالحې عالي شورا د رهبري غړې صفیه صدیقي د سولې پروسې او د بین الافغاني مذاکراتو په اړه خبرې وکړې او پدې برخه کې یې د اندونیزیا رول غښتلی یاد کړ.
همدارنګه آغلې ستاره مخبت او ډاکټر ضیاګل رضايي د مصالحې شورا مشرتابه غړو هم د سولې په برخه کې د افغانستان خلکو سره د انډونیزیا د همکاریو په اړه هر اړخیزه خبرې وکړې.
په پای کې ډاکتري موریتاني مخلصين او ډاکټر محی الدین جنیدي د انډونیزیایي پلاوي په استازیتوب خبرې وکړې او د ښځینه عالمانو د ظرفیت لوړولو، دوی ته د زده کړو او همکاریو او په دې برخه کې د تجربو په لیږدولو کې د لا زیاتو همکاریو ژمنه وکړه.
