د مدینې منورې د حج بعثې په دفتر کې د ارشاد، حج او اوقافو وزیر تر مشرۍ لاندې غونډه ترسره شوه
۵ محرم الحرام ۱۴۴۵ هـ ق مطابق اول د اسد ۱۴۰۲ هـ ش د افغانستان اسلامي امارت د ارشاد، حج او اوقافو وزیر او د حج بعثې عمومي رئیس شیخ الحدیث دکتور مولوي نورمحمد ثاقب په مشرۍ نن د شنبې ورځ د مدینې منورې د حج بعثې په دفتر کې د حج د پروسې د لګښتونو د تصفیه کولو، په بعثه کې د شته اجناسو او وسایطو د ثبتولو، او له مدینې منورې څخه هېواد ته د حاجیانو د لیږد د منظم بهیر په موخه غوڼده ترسره شوه. غونډه چې د قرآن کریم د څو مبارکو آيتونو په تلاوت سره پيل شوه، د حج بعثې د اداري پلاوي ترڅنګ د کاري کمېټو مسوؤلينو او د وزارت د مرکزي او ولايتي رياستونو يو شمېر رئيسانو په کې ګډون درلود. غونډه د ارشاد، حج او اوقافو وزیر په عالمانه وینا سره پرانیستل شوه او وی ویل: لله الحمد موږ د حج د پروسې په وروستي پړاو کې یو، نو دا لویه دیني او ملې پروسه باید په پوره اخلاص او ژمنتیا سره په مخ یوسو، او په ښه توګه یې اختتام ته ورسوو. ښاغلي ثاقب د کمېټو اړونده مسوؤلین خپلو ورسپارل شویو دندو ته لا ښه متوجه کړل او هیله یې څرګنده کړه چې د مهمو او اړينو کارونو د راټولولو لپاره جدي کار وکړي او مسوؤلینو ته یې د کارونو د لا ښه پرمخ بیولو په موخه لازمې سپارښتنې وکړې. ورپسې دغونډې ګډونوالو په بیلا بیلو موضوعاتو په تفصیل سره بحث او خبرې وکړي، غونډه د اسلامي نظام د بقاء او استحکام او د حج د پروسې د کامیابۍ د دعاء په ویلو سره پای ته ورسیده.
