د ارشاد، حج او اوقافو وزارت مسلکي مرستیال د جوماتونو د ښه مدیریت او انسجام په تړاو غونډه ترسره کړه
۸ ربیع الأول ۱۴۴۵هـ ق (۱ میزان ۱۴۰۲هـ ش)
د ارشاد، حج او اوقافو وزارت مسلکي معین شیخ الحدیث مولوي زرمحمد حقاني د خپل کار په دفتر کې د ارشاد او جوماتونو چارو د انسجام عمومي رئیس مولوي محمد نبي محمدي او ددې ریاست اړوند کارمندانو او د کابل ښار د (۲۲) ناحیو له مدیرانو سره غونډه ترسره کړه.
غونډه د قرآن کریم څو مبارکو آیتونو په تلاوت سره پیل شوه، ورپسې یاد وزارت مرستیال شیخ الحدیث مولوي زرمحمد حقاني د خپلو خبرو په ترڅ د جوماتونو د ارشادي چارو د تنظیم او اصلاح په برخه کې ګټورې لارښوونې وکړې او د جوماتونو د تنظیم په برخه کې د ستونزو او مشکلاتو د حل په موخه اړینې سپارښتنې وکړې.
ښاغلي حقاني وویل: د متحدې (عربي) خطبې او د جمعې د (وعظ او نصیحت) لارښود خطبې، چې ورځني اړین موضوعات بلل کېږي د ملت او ولس سره د جوماتونو له لارې شریک شي او همدا راز د جوماتونو د حفظ الصحه (پاکوالي) ته ځانګړې پاملرنه وشي، د جوماتونو د بریښنا او اوبو مصارفو ته جدي توجه وشي.
نوموړي زیاته کړه د جوماتونو امامان په ټولنه کې پیشوا او مشران دي، دوی باید د خپلو خلکو د اصلاح او روزنې لپاره په جوماتونو کې د ماشومانو او نورو وګړو ته د فقهې او دیني زده کړو حلقې جوړې کړي، د قرآن کریم د ژباړې او تفسیر درسونه تنظیم کړي او هم د دوی د پوهې لوړولو، قرائت او خطابت د ښه کولو لپاره کار وکړي.
د خپلو خبرو په پای کې ښاغلي حقاني د دغه ریاست د کارکونکو ستونزي او مشکلات واورېدل او دوی ته یې د هر اړخیزې همکارۍ ډاډ ورکړ.
د غونډې په پای کې ټولو کارمندانو ژمنه وکړه، چې د ارشاد، حج او اوقافو وزارت محترم مقام د پاليسۍ مطابق به خپل وظايف په پوره اخلاص او صداقت سره ترسره کوي
