د ارشاد، حج او اوقافو وزیر په 36 هېوادونو کې د افغانستان له سفیرانو سره د افغان سولې په تړاو خبری.

پنجشنبه ٣٠ سلواغې ١٣٩٩

کابل: نن د ارشاد، حج او اوقافو وزیر محمد قاسم حلیمي د بهرنیو چارو وزیر محمد حنیف اتمر په ګډون په 36 هېوادونو کې د افغانستان له سفیرانو سره د افغان سولې په تړاو د ویډیو کنفرانس له لارې خبرې وکړې.

ښاغلي حلیمي په دغه ویډیويي کنفرانس کې له افغان سفیرانو وغوښتل، تر څو په دغو هېوادونو کې له اسلامي سازمانونو او خوځښتونو سره د افغان جګړې د پای ته رسولو په موخه د ټولې اسلامي نړۍ د علماوو او اسلامي سامانونو واحد نظر ته لار هواره کړي.

دغه راز ښاغلي حلیمي له افغان سفیرانو وغوښتل، چې ددې اسلامي هېوادونو له علماوو او اسلامي سازمانونو سره خبرې وکړي؛ چې د افغانستان علماء د هغوی هېوادونو ته سفر وکړي او د هغو هېوادونو علماء افغانستان ته را دعوت کړي، چې په دې سره به د افغانستان دیني او فرهنګي اړیکې له اسلامي نړۍ پیاوړې او پراختیا پیدا کړي.

ښاغلي حلیمي له یادو سفیرانو څخه غوښتنه وکړه، چې د حرمین شریفین، د مصر الازهر شریف، رابطه عالم اسلامي، د هند دیوبند او نورو اسلامي مراکزو او سازمانونو سره په ګډه کار وکړي، ترڅو په افغانستان کې د جنګ لمنه ورټوله او یو سوکاله، اباد او پرمختللی هېواد  ولرو.