د ارشاد، حج او اوقافو وزیر په ایران هېواد کې د افغانستان له سفیر سره وکتل
۸ رمضانالمبارک ۱۴۴۴ هـ ق (۱۰ حمل ۱۴۰۲ هـ ش)
د افغانستان اسلامي امارت د ارشاد، حج او اوقافو وزیر شیخ الحدیث دکتور مولوي نور محمد ثاقب او ددې وزارت د رهبرۍ یو شمېر غړو د ایران په اسلامي جمهوريت کې د افغانستان له سفیر ښاغلي مولوي فضل محمد حقاني سره په خپل کاری دفتر کې وکتل.
په دې کتنه کې د ارشاد، حج او اوقافو وزیر یاد سفیر ته دښه راغلاست ویلو ترڅنګ دوی ته د دغي دندې او مسؤلیت مبارکي وویله او د الله تعالی څخه یې ورته دلا زیاتو بریاوو او خدمت کولو هیله وکړه.
نوموړي زیاته کړه، چې د افغانستان اسلامي امارت د اسلامي نظام تر سیوري لاندې د سرتاسری امنیت د تامین ترڅنګ د خپلو خلکو د خدمت لپاره صادقانه ګامونه پورته کوي او له ټولو هېوادونو په ځانګړي ډول له اسلامي هېوادونو سره دښو ډیپلوماتیکو اړیکو غوښتنه کوي.
همدا راز په یاده کتنه کې په ایران کې د مېشتو افغانانو په حالاتو او اسلامي امارت سره ددغه هیواد د اړیکو پراخولو په تړاو هر اړخیزې خبرې وشوې.
ورپسې په اسلامي جمهوری ایران کې د افغانستان اسلامي امارت سفیر مولوي فضل محمد حقاني وویل چې په ایران هیواد کې مېشت افغانان د ارشاد، حج او اوقافو وزارت څخه غوښتنه لری، چې د راتلونکي حج په پروسه کې د دوي سهم ډېر شي او د حجاجو کرامو معلمین هم ددغو مېشتو افغانانو څخه وټاکل شي.
په پای کې دارشاد حج او اوقافو وزیر دوی ته د راتلونکي حج په پروسه کې د سهم د زیاتوالي او دهغه ځای میشتو افغانانو څخه د حاجیانو د معلمینو ګمارلو په اړه ډاډ ورکړ
