د ارشاد، حج او اوقافو وزیر نیمروز ولایت ته د خپل سفر په ترڅ کې ددې ولایت له علماء کرامو سره ولیدل
جمعه: ۲۲ شعبان المعظم/۱۴۴۳هـ ق _ ۵ حمل/۱۴۰۱هـ ش
ولایتونو ته د سفرونو په لړ کې د ارشاد، حج او اوقافو وزیر شیخ الحدیث دوکتور نورمحمد ثاقب نن د غرمې مخکې نیمروز ولایت ته سفر وکړ او هلته یې ددې ولایت له دیني عالمانو، د جوماتونو له امامانو او خطیبانو سره غونډه ترسره کړه.
د غونډې په پیل کې د ارشاد، حج او اوقافو وزیر ښاغلی ثاقب د نیمروز ولایت ولس د ستاینې ترڅنګ له راغلو علماء کرامو او شیوخو څخه مننه وکړه، چې د زیاتو مصروفیاتو سربیره یې دلته د راتګ تکلیف وکړ.
نوموړي وویل، علماء کرام چې د انبیاوو وارثان دي او د ټولنې د رهبرۍ او زعامت مسئولیت په غاړه لري، باید د خپل مسئولیت په ښه توګه اداء کولو لپاره متوجه شي. همدې مسئولیت ته په کتلو اوس علماء کرامو ته په کار ده چې د شهیدانو په وینو ګټلي اسلامي نظام څخه په کلکه ملاتړ وکړﺉ، د اصلاح او تقویت لپاره یې په اسانه طریقې سره هڅې وکړﺉ او خپل رغنده انتقادات باید په مناسبه توګه تر ذیصلاح مسئولینو ورسوي او په اعلانیه طریقې سره نیوکو څخه ډډه وکړي.
په پای کې غونډه په دعائیه سره پای ته ورسېده.
له دې وروسته ښاغلي وزیر صاحب او ورسره پلاوي د نیمروز ولایت د ارشاد، حج او اوقافو ریاست څخه د لیدنې پرمهال ددغه ریاست له رئیس مولوي فضل الرحمن مستغفر، کارکونکو او کارمندانو سره د دوي د ستونزو او لاسته راوړنو په تړاو غونډه ترسره کړه.
په یاده غونډه کې د ارشاد، حج او اوقافو وزیر شیخ الحدیث دوکتور نور محمد ثاقب ددې ریاست د کامندانو لاسته راوړنې، ستونزي او وړاندزونه واوریدل او دوي ته يې د لازمو اقداماتو ډاډ ورکړ.
