د ارشاد، حج او اوقافو وزیر او ورسره پلاوى له ازبکستان څخه نن بېرته خپل هېواد راستون شو.
چهارشنبه ۱۰ رمضان المبارک ۱۴۴۵ هـ ق (۱ وری ۱۴۰۳ هـ ل)
د ارشاد، حج او اوقافو محترم وزیر شیخ الحدیث سرمحقق دوکتور مولوي نورمحمد ثاقب تر مشرۍ لاندې د هېواد د علماوو لس کسیز لوړی پوړی پلاوی چې د تیرې شنبې ورځ د رمضان المبارک په ٦ نېټه د ازبکستان هېواد د مسلمانانو د ادارې مشر مفتي شیخ نورالدین خالق نظر په رسمي بلنه دغه هېواد ته تللى و، نن سهار بېرته هېواد ته راستون شو.
شیخ الحدیث سرمحقق دوکتور مولوي نور محمد ثاقب او ورسره پلاوي په دغه سفر کې د ازبکستان هېواد د تاشکند، بخارا او سمرقند ښارونو له دیني او اسلامي مرکزونو څخه د لیدنې ترڅنګ د دغه هېواد د اسلامي بنسټونو له مسؤلینو سره د دوه اړخیزو اړیکو او همکاریو د پیاوړتیا، په دیني او ښوونیزو برخو کې د دواړو هېوادونو د فعالیتونو په همکارۍ او همغږۍ خبرې اترې وکړې.
د ارشاد، حج او اوقافو وزیر ازبکستان څخه هېواد ته د را گرځېدو پر مهال وویل، چې افغانستان او ازبکستان دوه اسلامي هېوادونه دي، چې ډېر نږدې ديني، کلتوري او ژبني مشترکات لري. چې د دغو مشترکاتو د لا تقویت لپاره به په ګډه کار کوي.
نوموړي په خپلو خبرو کې دغه سفر لاسته راوړنو ډک وباله او هیله یې څرګنده کړه، چې له نورو هېوادونو په ځانګړي توګه له اسلامي هېوادونو سره دغسې اړيکو ته پراختيا ورکړي.
