د ارشاد، حج او اوقافو وزارت مالي او اداري مرستیال د ایران د اوقافو او خیریه چارو د سازمان له رئیس سره وکتل
۱۹ ربیع الأول ۱۴۴۵هـ ق (۱۲ د میزان ۱۴۰۲هـ ش)
د ارشاد، حج او اوقافو وزارت مالي او اداري مرستیال محترم مولوي عارف الله عارف د یو هیئت په مشرۍ چې د ایران د اسلامي جمهوریت په رسمي بلنه تهران ته سفر کړی وو، له ایراني چارواکو سره د خپلو کتنو په لړ کې یې نن د دغه هېواد د اوقافو او خیریه چارو ادارې له رئیس ښاغلي داکټر سید مهدی خاموش سره وکتل.
په دې کتنه کې دواړو لورو په بېلابېلو موضوعاتو خبرې اترې وکړې او د تجربو پر شریکولو او د همکاریو پر لا پراختیا یې ټینګار وکړ.
د ارشاد، حج او اوقافو وزارت مرستیال وویل: ایران زموږ دوست او ګاوندی هېواد دی؛ چې د دیني امورو سر بیره په ګڼو نورو برخو کې یو له بل سره ګډې او نږدې اړیکې لرو، یادو اړیکو ته باید لا نوره پراختیا او پیاوړتیا ورکړو.
ورپسې د هغه هېواد د اوقافو او خیریه چارو رئیس د ایران هېواد د قرآن کریم په سیالیو کې د ګډون لپاره د ممتازو قاریانو د معرفي کولو له امله د اسلامي امارت څخه مننه وکړه.
نوموړي د يادو سياليو پر دوام ټينګار وکړ او په دې برخه کې يې د لا زياتې همکارۍ غوښتنه وکړه، چې د افغانستان اسلامي امارت د ارشاد، حج او اوقافو وزارت د معين له لوري ورته ډاډ ورکړل شو.
