دارشاد، حج او اوقافو وزیر د اندونیزیايي پلاوي له مشر محمد يوسف کالا سره وکتل
سه شنبه، ۲۷ ذوالقعدة الحرام ۱۴۴۵ هـ ق مطابق ۱۵ جوزا ۱۴۰۳ هـ ش
د ارشاد، حج او اوقافو وزیر شیخ الحدیث سرمحقق قضاوتپوه دکتور نورمحمد " ثاقب " نن د خپل کار په دفتر کې د اندونیزیا د سرې میاشتې او جوماتونو د شورا رئیس د هغه هېواد د ولسمشر پخواني مرستیال محمد یوسف کالا او مل پلاوي سره وکتل.
په دغه کتنه کې چې د ارشاد، حج اوقافو وزارت مرستیالانو او یوشمیر رئیسانو هم برخه لرله، ښاغلي ثاقب راغلي پلاوي ته د ښه راغلاست ویلو تر څنګ وویل چې اندونیزیا او افغانستان دواړه اسلامي هېوادونه دي او ډیر ګډ مشترکات لري او د افغانستان اسلامي امارت له اندونیزیا سره ګډې همکارۍ او د اړیکو دپراختیا غوښتونکي دی.
ښاغلي ثاقب په خپلو خبرو کې وویل چې داشغال له خاتمي او فتحې وروسته په افغانستان کې بشپړ امن اوښه فرصتونه رامنځ ته شوې دی، اړینه ده چې د اندونیزیا د ورور هېواد او نورو اسلامی هېوادونو سره په بېلا بېلو تعلیمی، ارشادي او دیني برخو کې هر راز همکاری او همدردی ولرو.
ښاغلي ثاقب یادونه وکړه چې افغانستان له سختو حالاتو تیر شوی دی، اوس الحمد لله ستونزی ختمي شوی دی او افغانستان په نړۍ کې یو پر امن هېواد دی، په بیلابیلو برخو کې پرمختګونه روان دي، غواړو چې دنورو پر مختللو اسلامي هېوادونو په څیر ښه پرمختګ ولرو.
ورپسې د اندونيزيايي پلاوي مشر ښاغلي محمد یوسف کالا خبرې وکړي او افغانستان ته یې په خپل راتګ خوښي وښودله، او زیاته یې کړه خوشاله یم چې له خپلو همکارانو سره دلته د پخوا په پرتله یو ښه او ارام افغانستان وینو.
ښاغلي کالا وویل: د اسلامي امارت په راتګ سره د اسلامی بنسټونو دپیاوړتیا تر څنګ د بیارغونی په برخه کې هم د پام وړ کارونه شوي دی
ښاغلي کالا په خپلو خبرو کې هیله څرګنده کړه چې د افغانستان اسلامي امارت او اندونیزیا په مختلفو برخو کې د اړیکو په ټینکولو او پراختیا سره ښه پرمختګونه ولري.
د یادونې وړ ده، په دغه پلاوي کې چې مشر یې محمد یوسف کالا کوي د اندونیزیا د قوانینو او بشري حقوقو پخواني وزیر عبدالحمید اول الدین، د انرژۍ او کانونو پخواني وزیر سعید سودیرمن او یو شمېر نور لوړ رتبه مسوولین شامل وو.
