افغان حاجیانو ته په مدینه منوره کې د مبارکو ځایونو او زیارتونو د ورپیژندلو لړۍ پیل شوه
۸ ذوالقعدې ۱۴۴۶ هـ ق مطابق ۱۶ د ثور ۱۴۰۴ هـ ش
زرګونه هغه افغان حاجیان چې مدينې منورې ته رسيدلي دي، د افغانستان د حج بعثې د مناسکو کمېټې له لوري په ډلیزه توگه د عصري بسونو په واسطه د دې ښار زیارتونو، مبارکو او مقدسو ځایونو ته د زیارت اداء کولو لپاره ولیږدول شول.
د قباء جومات، د قبلتينو جومات، سبعه (اووه) جوماتونه او د غزوه اُحد د شهيدانو زيارت د مدينې منورې له هغو مبارکو ځايونو څخه شمېرل کېږي چې هر مسلمان یې په لیدلو سره د حضرت محمد صلی الله علیه وسلم او د هغه د یارانو او صحابه وو ژوند ته ورګرځي.
