ارشاد، حج او اوقافو وزیر د حج پروسې له کاري کمېټو څخه لېدنه وکړه.
۲۱ شوال ۱۴۴۴ هـ ق (۲۱ ثور ۱۴۰۲ هـ ش)
نن له غرمې مخکې د ارشاد، حج او اوقافو وزیر شیخ الحدیث دکتور مولوي نور محمد ثاقب د حج کاري کمېټو کارونو د ارزونې او حاجیانو ته د غوره خدماتو وړاندې کولو په موخه د مرکزي زون د حاجیانو په مجتمع کې دطعام خانې، د مجتمع له جومات، د حاجيانو خونو، روغتيايي کلينيکونو او د حج کاري کمېټو له کارونو څخه ليدنه وکړه.
په دې لېدنه کې له ښاغلي ثاقب سره د دغه وزارت د رهبرۍ یو شمېر غړو هم ملتیا کوله، د حج رئيس د ارشاد، حج او اوقافو محترم وزير ته د هرې کمېټي د کاري بهير او د حاجيانو لپاره د چمتو شويو اسانتياوو په اړه معلومات ورکړل.
ښاغلي ثاقب د یادي مجتمع د ټولو څانګو له لیدنې وروسته مسؤلینو ته د چارو لا ښه والي او حاجیانو ته د غوره خدمتونو وړاندې کولو په اړه لازمې سپارښتنې وکړې.
د یادونې وړ ده چې د ارشاد، حج او اوقافو وزارت رهبري د حج په بهیر کې د پلانونو او کړنلارو په تحقیق کولو سره او حاجیانو ته د امکان تر حده د خدمتونو وړاندې کولو په موخه سږ کال د مرکزي زون د حاجیانو مجتمع ترڅنګ د کندهار، هرات او بلخ زونونه مجتمعات هم ترمیم او بیا رغول شوي دي.
