په مکه مکرمه کې د ارشاد، حج او اوقافو وزیر او د حج بعثې عمومي رئیس د حاجیانو له معلمینو سره وکتل.
۵ ذوالحجة ۱۴۴۴ هـ ق ( ۲ د سرطان ۱۴۰۲ هـ ش)
په مکه مکرمه کې د ارشاد، حج او اوقافو وزیر او د حج بعثې عمومي رئیس شیخ الحدیث دکتور مولوي نور محمد ثاقب د حاجیانو له معلمینو سره د (عبدالله باجابر ) په عماره کې لیدنه تر سره کړه.
په پیل کې ښاغلي ثاقب د معلمینو د شپې او ورځې خدمتونو په وړاندې کولو سره خوښي څرګنده کړه.
نوموړي ویل: ستاسو له لیدنې څخه مو هدف د ګران هېواد حاجیانو ته د حج فریضې د اداء کولو لپاره د اسانتیاوو رامنځته کول دي.
لکه څنګه چې د حج ورځې په رارسېدو دي؛ باید د یو منظم پلان له مخې حاجیانو ته د ښو اخلاقو په پام کې نیولو سره د حج د مناسکو لارښوونه په ترتیب سره په نظري او عملي بڼه ور وښودل شي او د حاجیانو په لارښوونه کې باید له هغه کتاب څخه چې ددې وزارت له لوري د حج او عمرې د مناسکو لارښود تر عنوان لاندې چاپ او حاجیانو ته ویشل شوی ګټه واخیستل شي، باید حاجیانو ته داسې لارښوونه وشي چې د خپل ځان، کور، دوستانو، افغان مظلوم ملت ته او د افغانستان اسلامي امارت د دوام لپاره لاس په دعاء شي.
په پای کې یو شمېر معلمینو د نورو په استازیتوب خپل نظریات او وړاندیزونه غونډې ته وړاندې کړل او د وړانديزونو د اورېدلو نه وروسته محترم وزیر صاحب اړوندو مسؤولينو ته لازمې سپارښتنې وکړې
