د ارشاد، حج او اوقافو وزیر د یوه هیئت په مشرۍ په کابل کې د زړو قرآن کریمونو د خوندي ساتلو له جوړېدونکي ځای څخه کتنه وکړه
چهارشنبه، ۲۵/ رجب المرجب/ ۱۴۴۷هـ ق، مطابق ۲۵/ جدی/ ۱۴۰۴هـ ش
د ارشاد، حج او اوقافو وزیر محترم شیخ الحدیث سرمحقق دکتور مولوي نورمحمد ثاقب صاحب د یوه هیئت په مشرۍ، چې د وزارت مسلکي مرستیال محترم مولوي محمد حامد حسیب او یو شمېر مرکزي رئیسان هم ورسره وو، د کابل ښار د دارالامان په سیمه کې د زړو قرآن کریمونو، پارو، دیني کتابونو او نورو مقدسو اوراقو د ساتنې لپاره د جوړېدونکي ځانګړي ځای د چارو له بهیر څخه کتنه او ارزونه وکړه.
محترم وزیر صاحب د یادې پروژې د مسؤولینو او کارکوونکو له هڅو او روانو چارو ستاینه وکړه او دغه کار یې د مقدسو اوراقو د درناوي او د اسلامي ارزښتونو د ساتنې په برخه کې مهم او ارزښتناک وباله. نوموړي د چارو د لا ښه تنظیم، چټکتیا او معیاري بشپړېدو په موخه اړوندو مسؤولینو ته لازمې لارښوونې او سپارښتنې وکړې.
یاد ځانګړی ځای چې د دارالأمان په غرنیزه ساحه کې یې د کیندلو او جوړولو چارې د ملي دفاع وزارت اړوند د لسګونو کارکوونکو لخوا په څلورویشت (۲۴) ساعته توګه د پرمختللې ماشینرۍ پر مټ روانې دي، تر دې مهاله یې شاوخوا دیرش سلنه (۳۰٪) چارې بشپړې شوې دي او تمه ده چې په نږدې راتلونکې کې به یې پاتې کارونه هم بشپړ او ګټې اخیستې ته وسپارل شي.
د دغه نوښت موخه د عالیقدر امیر المؤمنین حفظه الله د ځانګړي هدایت پر اساس په هېواد کې د ارشاد، حج او اوقافو وزارت لخوا د زړو قرآن کریمونو، پارو، دیني کتابونو او نورو مقدسو اوراقو راټولول، درناوی او خوندي ساتل دي، چې دا مهال یې د جوړولو چارې د هېواد په یو شمېر ولایتونو کې روانې دي او ټاکل شوې ده چې په نږدې وختونو کې به د هېواد په ټولو ولایاتو کې پیل شي
