د ارشاد، حج او اوقافو وزیر او ورسره مل پلاوي د سمرقند له چارواکو سره د کتنې ترڅنګ ددې ښار له اسلامي مرکزونو څخه هم لیدنه وکړه.
دوشنبه ۸ رمضان المبارک ۱۴۴۵ هـ ق (۲۸ حوت ۱۴۰۲ هـ ش)
د ارشاد، حج او اوقافو محترم وزیر شیخ الحدیث سرمحقق دکتور مولوي نورمحمد ثاقب ازبکستان هېواد ته د خپل سفر په ترڅ کې د سمرقند ښار ته د رسېدو سره سم د دې ښار د والي، ښاروال او مفتي لخوا تود هرکلی وشو.
ورپسې له یادو مسؤلینو سره د دواړو هېوادونو (افغانستان او ازبکستان) د علماوو ترمنځ د دوه اړخیزو اړیکو او همکاریو، له یو بل سره د نظرونو شریکولو، د جوماتونو د امامانو د تدریب او په مدرسو کې د تدریس د کیفیت د ښه والي په اړه خبرې وکړې.
تر لیدنو وروسته یې د حضرت امام بخاري رحمه الله له مقبرې، دنبوي احادیثو تعلیمي څېړنیز مرکز چې د امام د مقبرې ترڅنگ موقعیت لري همداشان د نبوي احادیثو د عالي معهد، د دیني علومو مرکز او د دغه مرکز له ټولگيو، د قثم بن عباس رحمه الله قبر چې د شاه زنده په مقبره مشهور دی، د حضرت ابو منصور محمد ماتریدي مقبره، د ريگستان مجموعه چې درې مدرسې لري (مدرسه طلا قاری، مدرسه الغ بیک، مدرسه شیردار)، د الغ بیگ رصد خانه او د هغې رصدخانې نندارتون، د برهان الدین بخاري مرغیناني قبر، د خواجه ناصر الدین عبیدالله حرار ولي څخه لیدنې تر سره کړي.
رصدخانهٔ اُلُغبیگ: د ډیرو کارپوهانو په اند دغه بنا په اسلامي نړۍ کې یو له غوره رصد خانو تر څنګ د منځنۍ اسیا په کچه تر ټولو لویه رصد خانه بلل کیږی، د هغه وخت تر ټولو دعلم نجوم ستر پوهان د قاضي زاده رومي په شمول، غیاثالدین جمشید کاشاني او علي قوشچي په دې رصد خانې کې څېړنې کړي دي.
