د ارشاد، حج او اوقافو وزارت لخوا د هېواد په مرکز کابل او ټولو ولایاتو کې د روان کال د حج اداء کولو لپاره د قرعه اچونې بهیر ترسره شو
چهارشنبه، ۹/شعبان المعظم/۱۴۴۷هـ ق، مطابق ۸/دلو/۱۴۰۴هـ ش
د ارشاد، حج او اوقافو وزارت لخوا د ۱۴۴۷هـ ق، مطابق ۱۴۰۵هـ ش کال د حج فریضې د اداء کولو په موخه، د نوو ثبت نام شوو متقاضیانو ترمنځ د حج د قرعه اچونې بهیر نن په پلازمینه کابل او د هېواد په ټولو ولایاتو کې، د اړوندو ادارو د استازو په حضور او د یو لړ ځانګړو مراسمو په ترڅ کې ترسره شو.
په مرکز کابل کې د حج د قرعه اچونې بهیر د مرکزي زون د حاجیانو په مجتمع کې، چې د ارشاد، حج او اوقافو وزارت مسلکي مرستیال محترم مولوي محمد حامد حسیب، مرکزي رئیسانو او د حج عملیاتي اجرائیه کمېټې غړو پکې ګډون کړی وو، ترسره شو.
د غونډې په ترڅ کې د وزارت مسلکي مرستیال د دغه بهیر د څرنګوالي او شفافیت په اړه خبرې وکړې، نوموړي وویل: سږ کال د نوو ثبت نام شوو متقاضیانو د نوم لیکنې پروسه په مرکز کابل او ټولو ولایاتو کې، د جدی میاشتې په ۲۴ نېټه پیل او د دلوې میاشتې په ۴ نېټه پای ته ورسېده، چې د کابل ښار د نواحیو په شمول په ټول هېواد کې اته نوي زره، اووه سوه او دوه اویا (۹۸۷۷۲) تنو نوو متقاضیانو د حج اداء کولو لپاره نوملیکنه وکړه او نن چهارشنبه د هغوی ترمنځ د قرعه اچونې بهیر په ټول هېواد کې د ټاکل شويو اصولو له مخې د ارشاد، حج او اوقافو ریاستونو او د اړوندو ارګانونو د مؤظفو هیئتونو تر څارنې او نظارت لاندې هم مهاله ترسره شو.
د ارشاد، حج او اوقافو وزارت لخوا به د سږ کال د حج اداء کولو لپاره د قرعه اچونې له لارې منتخب شوي متقاضیان حج ته ولیږل شي
