د هېواد له درېو پروازي زونونو څخه مدینې منورې او مکې مکرمې ته د افغان حاجیانو د لیږد لړۍ په منظم ډول جریان لري
۱۲ ذوالقعدې ۱۴۴۶ هـ ق مطابق ۱۹ ثور۱۴۰۴ هـ ش
د ارشاد، حج او اوقافو وزیر شیخ الحدیث سرمحقق دکتور نور محمد ثاقب په مشرۍ او تر مستقیم نظارت لاندې د ۱۴۴۶ هـ ق کال د حج پروسه تر دې دمه په منظم ډول روانه ده، چې د هېواد له درېو پروازي زونونو څخه د حاجیانو الوتنې مدینې منورې او مکې مکرمې ته د ټاکل شوي تقسیم اوقات له مخې ترسره کیږې.
ښاغلي ثاقب په هېواد کې د ننه او له هېواد څخه بهر افغان حاجیانو ته په ټولو برخو کې د مسؤولینو له لوري د وړاندې شویو خدمتونو یادونه وکړه او د حج پروسې ټولو دخیلو کاري کمېټو مسؤولینو ته یې لازمې لارښوونې او سپارښتنې وکړې چې افغان حاجیانو ته د خدمت په ډګر کې له هيڅ ډول هڅو څخه ځانونه دریغ نه کړي او په ځانګړې توګه د تسکین، تغذیې، مفقودینو، روغتیایي، ټرانسپورټ، مناسکو او نورې اړوندې کاري کمېټې چې له شته ټولو امکاناتو څخه په ښه ډول کار واخلي ترڅو افغان حاجیان په ارامه فضا کې خپل عبادتونه ترسره کړي.
د ارشاد، او اوقافو وزیر وویل: مونږ ته د راکړل شوي دیرش زره(۳۰۰۰۰) سهم څخه تقریباً نیمايي(۱۴۵۲۴)تنه حاجیان له هېواد نه حرمنیو شریفو ته د آریانا افغان او کام ایر هوایي شرکتونو په مرسته د (۴۶) الوتنو په ترڅ کې انتقال شوي دي او په نږدې ورځو کې به د قندهار ولایت د احمدشاه بابا له نړیوال هوایي ډګر څخه هم د حاجیانو پروازونه پیل شي.
د یادونې وړ ده چې نن د هېواد مرکزي زون د کابل ولایت د نواحیو (۳۴۶) تنه حاجیانو لومړی پرواز د کابل له نړیوال هوايي ډګر څخه د جدې هوایي ډګر په لور ترسره کړ.
