د هېواد په مرکز او ولایتونو کې د حاجیانو لپاره د حج مناسکو درسي بهیر پیل شو.
نیټه: ۷، ذوالقعده ۱۴۴۳هـ ق _ (۱۶، غبرګولی ۱۴۰۱ هـ ش)
د دې وزارت خبریال د حجاجو مجتمع څخه راپور ورکوي، چې د حج مناسکو لارښونې د ارشاد، حج او اوقافو وزارت یو شمېر مسوولينو، علماوو او د حاجیانو يوې لويې ډلې په ګډون نن د حاجیانو مجتمع په جامع جومات کې پيل شول.
د یادو مراسمو په پيل کې علماء کرامو د ددې مبارک سفر فضیلت او اهمیت روښانه کړ او یاد تدریس د شیخ الحدیث میر محمد فاروق، مولوي قاری سعیدالرحمن او مولوی اسرار الحق لخوا د حاجیانو مجتمع کې ترسره کیږي او تر پایه پوري به دوام ولري.
د حج د مناسکو کميټې مسوولينو په وينا، دغې کميټې د کاري پلان له مخې نن د هېواد په مرکز او ولايتونو کې د حج مناسکو درسونه پيل شو، د مناسکو ښونیز پروګرام د شیخانو او جیدو علماء کرامو لخوا پرمخ وړل کیږي، هغه حاجیان چې د حج پیسو دویم قسط یې تحویل کړی وي او اسناد یې بشپړ کړي وي، د حج د کمیټې له خوا دې حلقو ته معرفي کیږي.
د یادونې وړ ده، چې ذکر شوي درسونه د حج مراسمو په تړاو د حاجیانو چمتو والي لپاره د دوي ظرفیت او وړتیا ته په کتو په نظري ډول وړاندې کیږي.
