د افغانستان د حج بعثې رهبرې پلاوې د حج مراسمو د لا ښه تنظیم په موخه فوق العاده غونډه ترسره کړه
۶ ذوالحجة ۱۴۴۴هـ ق (۳ سرطان ۱۴۰۲ هـ ش)
په مکه مکرمه کې د افغانستان د حج بعثې په مرکزي دفتر کې د ارشاد، حج او اوقافو وزیر او د حج بعثې عمومي رئیس شیخ الحدیث دکتور مولوي نورمحمد ثاقب په مشرۍ د حج مراسمو د ښه تنظیم او مدیریت په موخه غونډه وشوه.
په غونډه کې منی ،عرفات او مزدلفې ته د افغان حاجیانو د لیږد او په نورو مهمو موضوعاتو خبرې اترې وشوې.
په ياده غونډه کې د دې وزارت مرستیالانو، د افغانستان د حج قنسل ، په مکه مکرمه او مدینه منوره کې د حج بعثې اړوند کاري کمېټو مسؤولینو ګډون درلود.
غونډه د قرآن کریم د مبارکو آیتونو په تلاوت سره پیل شوه، ورپسې په مکه مکرمه کې د حج بعثې د کاري کمېټو مسؤولینو په مشاعرو کې د اړونده کمېټو لکه د مناسکو، ټرانسپورټ، تغذیې، نشراتو، مفقودینو، بهرنیو اړیکو، او روغتایي برخو کې د خپلو کارونو راپور رهبرۍ پلاوې ته وړاندې کړ، د ارشاد، حج او اوقافو وزیر د راپورونو له اورېدو وروسته د بعثې د کارکوونکو د کار، زیار او په کارونو کې د سخاوت ستاینه وکړه او زیاته یې کړه، چې الحمدلله په مشاعرو کې د افغان حاجیانو لپاره د غوره خدمتونو او اسانتیاوو د برابرولو لپاره ډیر کار باید وشوی ترڅو حاجیان په منظم ډول منی ته او له هغه ځایه عرفات او مزدلفې ته ولیږدول شي.
ښاغلي ثاقب د یادو کمېټو مسؤولینو ته سپارښتنه وکړه، چې باید د افغان حاجیانو ټول معلمین، مسوؤلین، او د بعثې غړې خپل ورسپارل شوي مسوؤلیتونه په ښه ډول ترسره کړي او په مشاعرو کې حاجیانو ته سمې او ضروري لارښوونې وکړئ او هیله لرو چې د سږني کال د حج پروسه یو بریالۍ او کامیاب حج پروسه ولرو.
