د ارشاد، حج او اوقافو وزارت استازي د مالي او اداري عمومي رئیس د سعودی عربستان د جنوبی آسیا موسسې له رئیس سره وکتل
سعودي عربستان، جده: د ارشاد، حج او اوقافو وزارت مالي او اداري عمومي رئیس محترم مولوي عبدالولي حقاني، چې ددې وزارت با صلاحيته استازي دی په سعودي عربستان کې د حج پروسې اړوند موضوعاتو ته په پام سره، نن په جده کې د حج او عمرې د خدمتونو کنفرانس او نندارتون په مرکزي دفتر کې د جنوبي آسیا موسسې له رئیس اسامه عبدالله دانش سره وکتل.
په دې کتنه کې افغان حاجیانو ته د غوره او لازیاتو خدمتونو د وړاندې کولو په اړه په بېلابېلو موضوعاتو خبرې اترې وشوې او همدا راز د ياد شرکت د مکتبونو خدمتونو وړاندې کولو په برخه کې د تېر کال پر ستونزو هم خبرې وشوې او د جنوب آسيا موسسې رئيس ژمنه وکړه، چې د تېر کال نيمګړتياوې به جبرانوي او د افغانستان حاجیانو ته د امکان تر حده غوره خدمات وړاندې کوي.
د یادونې وړ ده، چې د جنوب اسیا موسسه د حج په موسم کې حاجیانو ته اړینو خدماتو وړاندې کولو مسؤلیت په غاړه لری.
