د ارشاد، حج او اوقافو وزارت له لوري په ټول هېواد کې د حج پچه اچونه (قرعه کشي) ترسره شوه
۴ شعبان المعظم۱۴۴۶هـ ق (۱۵ دلو ۱۴۰۳ هـ ش)
د افغانستان اسلامي امارت د ارشاد، حج او اوقافو وزارت لخوا په پلازمینه کابل او په ټولو ولایتونو کې د ۱۴۴۶هـ ق مطابق ۱۴۰۴هـ ش کال د حج لپاره د نويو متقاضیانو نوم لیکنه چې څه موده وړاندې پیل شوې وه، نن په کابل او ولایتونو کې د ځانګړو غونډو په ترڅ کې د پچې اچونې (قرعه کشي) بهیر تر سره شو.
د ولایتونو ترڅنګ په مرکز کابل د حاجیانو په مجتمع کې یاده غونډه چې په همدې مناسبت جوړه شوې وه، د دې وزارت مسلکي مرستیال، د مرکزي ریاستونو رئیسانو، د حج د داخلي کمېټې غړو او یو شمېر د حج نویو متقاضیانو پکې گډون کړي وو.
غونډه د قرآن کریم څو مبارکو آیتونو په تلاوت سره پیل شوه، ورپسې د ارشاد، حج او اوقافو وزارت مسلکي مرستیال شیخ الحدیث مولوي زرمحمد حقاني د حج د پچې اچونې په تړاو خبرې وکړې او زیاته یې کړه، چې د نوم لیکنې پروسه څه موده وړاندې په مرکز او ولایتونو کې پیل شوې وه چې نن د یو شمېر نویو متقاضیانو او د هغوی د استازو په شتون کې پچه اچونه (قرعه کشي) ترسره کیږي.
نوموړي وویل: په ټول هېواد کې(۱۰۵۱۸۰) تنو نویو متقاضیانو نوم لیکنه کړې ده، چې نن به د پچې اچونې بهیر د مرکز کابل سربیره د ټولو ولایتونو د ارشاد، حج او اوقافو ریاستونو د اړونده مسؤولینو په حضور کې تر سره شي.
د غونډې په پای کې د ارشاد، حج او اوقافو وزارت د مرستیال له لوري د پچې اچونې صندوق پرانستل شو او په ټول هېواد کې دغه پروسه په رسمي ډول پیل شوه چې د ورځې تر پایه په ټولو ولایتونو کې پچه اچونه ( قرعه کشي) سرته ورسیدله.
