د ارشاد، حج او اوقافو وزیر د ازبکستان هېواد د جیدو علماوو له پلاوي سره په خپل کاري دفتر کې وکتل
چهارشنبه ۲۰ ربیع الثاني ۱۴۴۶ هـ ق (۲ عقرب ۱۴۰۳ هـ ش)
د ارشاد، حج او اوقافو وزیر شیخ الحدیث سرمحقق قضاوتپوه دکتور مفتي نورمحمد ثاقب په رسمي بلنه د ازبکستان هېواد د مسلمانانو د ادارې مشر محترم مفتي شیخ نورالدین خالق نظر په مشرۍ مل پلاوي سره نن په خپل کاري دفتر کې وکتل.
د لیدنې په پېل کې د ارشاد، حج او اوقافو وزیر راغلو میلمنو ته ښه راغلاست ووایه ، او زیاته یې کړه : «خوشاله یوو، چې د دوست گاونډي هېواد ازبکستان د دیني علماوو د پلاوي کوربتوب کوو.»
ښاغلي ثاقب په خپلو خبرو کې وویل: د ازبکستان هېواد د جېدو علماوو او لوړ پوړو دولتي چارواکو راتګ د افغانستان د اسلامي امارت او افغان ولس سره د ښه ګاونډیتوب، نیک نیت، او گډو متقابلو گټو د تعامل اوهمکاریو ښکارندویي کوي
نوموړي وویل: څه موده وړاندې چې ستاسو په رسمي بلنه مونږ ازبکستان ته درغلي وو، له هغه سفر څخه مونږ ډیر خوښ یو او ښې خاطرې لرو د ارشاد، حج او اوقافو وزیر زیاته کړه د ازبکستان هېواد د علماوو دا سفر مونږ ته دا فرصت راکوي چې د مشترکو باورونو پر بنسټ نوې همکارۍ او اړیکې رامنځته کړو او د دې سفر له لارې به مونږ ته د یو او بل د کلتور، تاریخ او ارزښتونو په اړه د لا ښه پوهیدو زمینه برابره شي.
د ارشاد، حج او اوقافو وزیر زیاته کړه: موږ د نړیوالو او په ځانګړي توګه د اسلامي هیوادونو له وګړو څخه غوښتنه کوو، چې افغانستان ته سفرونه وکړي او حالات له نږدې وگوري.
د نږدې لیدنو له لارې، نړیوالې ټولنې ته د افغانستان د واقعیتونو او د اسلامي امارت په راتګ سره د ښو او مثبتو پرمختگونو ښه انځور وړاندې کېدی شي او د اسلامي هېوادونو ترمنځ د همکارۍ او همغږۍ نوې لارې چارې موندل کېدای شي.
ورپسې د ازبکستان هېواد د مسلمانانو د ادارې مشر، مفتي شیخ نورالدین خالق نظر خبرې وکړې او وویل: «د شیخ الحدیث سرمحقق دکتور نورمحمد ثاقب څخه د سفر د رسمي بلنې له امله د زړه له کومي مننه کوو، دا سفر زمونږ د گډو ارزښتونو او باورونو د تقویت لپاره یو ارزښتناک فرصت دی، او زه خوشحاله یم چې له تاسو سره یم.» نوموړي وویل: ازبکستان او افغانستان دواړه اسلامي او گاونډي هېوادونه دي او په دیني، کلتوري، مذهبي چارو کې زیات ورته والی لري او د اړیکو د لا ټینگښتت او پراختیا لپاره زمونږ دغه شان سفرونه او لېدنې گټوري او حیاتي دي.
د یادونې وړ ده چې د ازبکستان هېواد د جېدو علماوو پلاوی به د افغانستان اسلامي امارت له لوړ پوړو چارواکو او علماء کرامو سره د لیدنو ترڅنگ د هېواد له تاریخي، مقدسو او مشهورو ځایونو څخه هم لیدنه تر سره کړي
