د ارشاد، حج او اوقافو وزیر د اسلامي همکاریو سازمان (OIC) پلاوي سره وکتل

۱۸ صفر المظفر ۱۴۴۵ هـ ق (۱۲ سنبله ۱۴۰۲ هـ ش)

کابل: د افغانستان اسلامي امارت د ارشاد، حج او اوقافو وزیر شیخ الحدیث دکتور مولوي نورمحمد ثاقب د اسلامي همکاریو سازمان (OIC) دهیئت مشر او د مجمع الفقه الاسلامي عمومي سر منشي دکتور قطب محمد سانو او د هیئت له غړو سره په کابل کې وکتل.

په دغه لېدنه کې د ښاغلي ثاقب ترڅنګ د دې وزارت مرستیالانو او د مرکزي ریاستونو یو شمېر رئیسانو هم ګډون درلود.

په پیل کې د ارشاد، حج او اوقافو وزیر شیخ الحدیث دکتور مولوي نورمحمد ثاقب د یاد سازمان او د مجمع الفقه الاسلامي راغلو علماء کرامو ته ښه راغلاست ووایه.

په لومړي سر کې د هیئت مشر دکتور قطب محمد سانو په تفصیل سره خبرې وکړې او اسلامي امارت ته یې  د فتحې مبارکي وویله او هغه لاسته راوړنې چې په مختلفو برخو کې په افغانستان کې رامنځ ته شوي دي هغه یې وستایلې.

نوموړي وویل، په مختلفو برخو کې چې اسلامي امارت  ورته ضرورت لري که هغه د تعلیم برخه ده او که پراختیا برخه ده موږ تل له امارت سره همکار یو.

همدا شان ښاغلي سانو زیاته کړه، موږ او اسلامي نړی د اسلامي امارت ترڅنک ولاړ یو، همدا رنګه په یاده لیدنه کې راغلو علماء کرامو په خپل نوبت سره په افغانستان کې د رامنځته شوي  امنیت او قوي دولت او نورو پرمختګونو په تړاو نظرونه شریک کړل.

ورپسې شیخ الحدیث دکتور مولوي نور محمد ثاقب د دوی د راتګ څخه مننه وکړه او د علماء کرامو تګ راتګ یې د اسلامي هېوادونو ترمنځ خورا مهم وباله.

همدا راز ښاغلي ثاقب وویل، د اسلامي امارت استازي او داسلامې همکاریو دسازمان استازي باید په بېلابېلو وختونو کې کنفرانسونه او ګډې غونډې ترسره کړي او خپلي  تجربې او نظرونه له یو بل سره شریک کړي.

نوموړي زیاته کړه، په اسلام کې مشوره  او نظر شریکول یو اصل دي او د نظرونو تبادله، وړاندیزونه او مشورې ډېر مهم دي چې موږ او تاسو یې باید ترسره کړو.

د غونډې په لړ کې محترم وزیر وویل، په افغانستان کې ډېر پرمختګونه شوي دي او اسلامي امارت کوښښ کوي، چې په نورو برخو کې هم لازیاتې اسانتياوې  خپل ولس ته برابري کړي.

ددې لیدنې په پای کې دواړو لورو یو بل ته ډالۍ ورکړي، یاده غونډه دمسلمه امت داتحاد او یوالی غوښتلو په دعاء سره پای ته ورسېده.