د ارشاد، حج او اوقافو وزارت د عرفان او دیني ځایونو د چارو تنظیم مرستیال د قرآن عظیم الشان د ترجمو او تفسیر دورو د څارنې او ارزونې په تړاو لغمان ولایت ته ولاړ.
۲۸ شعبان المعظم ۱۴۴۵ هـ ق (۱۹ حوت ۱۴۰۲ هـ ش)
د ارشاد، حج او اوقافو محترم وزیر شیح الحدیث سرمحقق دکتور مولوي نور محمد ثاقب د حکم په اساس ددې وزارت د عرفان او دیني ځایونو د چارو تنظیم مرستیال شیخ مولوي عزیز الرحمن منصور او ورسره مل پلاوي لغمان ولایت ته د خپل سفر په ترڅ کې له هغو نظامي مرکزونو څخه لیدنه وکړه، چې د دغه وزارت له لوري په کې د قرآن کریم د تفسیر او ترجمې دورې د شعبان المعظم میاشتې له لومړۍ نېټې څخه پیل شوې وې او دغه تفسیر او ترجمې به د رمضان المبارک میاشتې تر (۲۵) مې نېټې پورې دوام لري.
ددې لیدنو په ترڅ کې د یاد وزارت د عرفان او دیني ځایونو د چارو تنظیم مرستیال وویل: قرآن کريم ستر لارښود او د هدايت کتاب دی، نو که مونږ وغواړو چې په سمه لار روان شو، بايد مونږ او تاسو د قرآن کریم لمن ونيسو او په قرآن کریم باندې عمل وکړو. ځکه قران کريم دی چې له يوې بدې ټولنې څخه ښه ټولنه، له غير مسلمان څخه مسلمان، له فاسق څخه دينداره او له غير مجاهد څخه مجاهد جوړولای شي.
د یادونې وړ ده چې د لغمان ولایت اړوند په پنځو نظامي مرکزونو کې د ارشاد، حج او اوقافو وزارت له لوري د قرآن کریم د تفسیر او ترجمې دورې تر سره کېږي، چې د یادو نظامي مرکزونو څخه سلگونه تنه مجاهدین د تفسیر او ترجمو په دورو کې گډون کوي.
