د ارشاد، حج او اوقافو وزیر د کام ایر هوايي شرکت له مسوولینو سره وکتل.
نيټه، 9 شوال، ۱۴۴۳ هـ_ د ۱۴۰۱ هـ ق کال د غویی 19 مه
نن د ارشاد، حج او اوقافو وزیر شیخ الحدیث دوکتور نور محمد ثاقب د کام ایر هوايي شرکت له مسوولینو سره وکتل.
په پیل کې د ارشاد، حج او اوقافو وزیر د حاجيانو د لېږد او راستنېدو په برخه کې د یاد شرکت د پلانونو او اقداماتو په اړه د معلوماتو او توضيحاتو غوښتنه وکړه.
په دې کتنه کې د ارشاد، حج او اوقافو وزیر او ددې وزارت د رهبرۍ یو شمېر غړو هم حضور درلود.
له ياد شرکت څخه د حاجيانو د ليږدونې د پلان او اقداماتو، د هغوى د وړتيا او ظرفيت ترڅنګ د حاجيانو د ليږدونې د لګښتونو په اړه هم معلومات وغوښتل شول.
د یاد شرکت مسوولینو په خپل وار د وزارت رهبري غړو ته د شته ظرفیتونو او اسانتیاوو او د حاجیانو د لېږد د پلان په اړه هر اړخیز معلومات وړاندې کړل او زیاته یې کړه، چې د حاجيانو لېږد سوداګري نه، بلکې خپل ديني مکلفيت وګاڼه او ژمنه يې وکړه، چې حاجيانو ته د لا زياتو اسانتياوو په برابرولو کې هر راز همکاریو ته چمتو دي.
په پای کې د کام ایر هوایي شرکت د مسوولينو د نظرونو او وړانديزونو له اورېدلو وروسته پرېکړه وشوه، چې د دوى د ټکټونو وروستي نرخونه او شرايط دې له دغه وزارت سره په ليکلي ډول مطرح شي.
