د ارشاد، حج او اوقافو وزیر د سعودي عربستان سفارت دقنسولی له مستشار سره وکتل.
کابل: ۱۸، رمضانالمبارک /۱۴۴۳هـ ق.(۳۰، وری ۱۴۰۱ هـ ش)
د افغانستان اسلامي امارت د ارشاد، حج او اوقافو وزیر شیخ الحدیث دوکتور نور محمد ثاقب او ددې وزارت د رهبرۍ یو شمېر غړو په ګډون په کابل کې د سعودي عربستان سفارت دقنسولی له مستشار ښاغلي بدر ابراهیم مجول العتیبي سره په خپل کاری دفتر کې وکتل.
په دې کتنه کې د ارشاد، حج او اوقافو وزیر د یاد هیواد مرستیال سفیر حضور ته ښه راغلاست ترڅنګ د افغانستان له خلکو سره د سعودي عربستان د دوامداره همکاريو په تړاو مننه وکړه او دغه هېواد ته يې د حج او زيارت په برخه کې د دغه هېواد دلا زیاتې همکاری او پراختيا غوښتنه وکړه.
نوموړي زیاته کړه، چې د افغانستان اسلامي امارت د اسلامي نظام تر سیوري لاندې د سرتاسری امنیت د تامین ترڅنګ د خپلو خلکو د خدمت لپاره صادقانه ګامونه پورته کړي او له ټولو هېوادونو په ځانګړي ډول له اسلامي هېوادونو سره د ډیپلوماټیکو اړیکو غوښتنه کوي.
شیخ الحدیث دوکتور نور محمد ثاقب د سږ کال د فرضي حج بهیر د پیلیدو د هرکلي په ترڅ کې له سعودي عربستان څخه د لا زیاتو همکاریو غوښتنه وکړه.
د دغه پروګرام د راتلونکو پړاوونو لپاره د عملي اقداماتو په اړه، له مستشارڅخه وغوښتل شول، چې د افغان حاجیانو لپاره د لا زیاتو اسانتیاوو او تمویل زمینه برابره کړي.
د سعودي عربستان سفارت دقنسولی مستشار د ارشاد، حج او اوقافو وزارت د رهبرۍ له تودي میلمه پالنې او هرکلي څخه مننه وکړه. نوموړي د ارشاد، حج او اوقافو وزیر یو نیک او علمي شخصیت وباله او په افغانستان کې یې د اسلامي امارت تر رهبرۍ لاندې د امن فضا رامنځته کېدو ستاینه وکړه.
